 |
12 Rhagfyr 2017
Annwyl Harriet
Ymchwiliad i hawliau dynol yng Nghymru
Ysgrifennaf atoch yn rhinwedd fy swydd fel Cadeirydd Pwyllgor Cydraddoldeb, Llywodraeth Leol a Chymunedau Cynulliad Cenedlaethol Cymru.
Mae’r Pwyllgor yn cynnal ymchwiliad i hawliau dynol yng Nghymru, Ers dechrau’r ymchwiliad mae’r Pwyllgor wedi culhau cwmpas ei gwmpas i ganolbwyntio ar effaith Brexit ar hawliau dynol.
Fel rhan o’n hymchwiliad bu’r Pwyllgor yn ddiweddar yn trafod statws diweddaraf y trafodaethau ymadael â’r Undeb Ewropeaidd, a chlywsom gan Rebecca Hilsenrath, Prif Weithredwr y Comisiwn Cydraddoldeb a Hawliau Dynol. Yn y cyfarfod, cytunodd y Pwyllgor ar gyfres o egwyddorion craidd y credwn y dylid cydymffurfio â nhw yn ystod y broses Brexit mewn perthynas â hawliau dynol a chydraddoldeb. Byddwn yn monitro cynnydd yn ôl yr egwyddorion hyn a byddwn yn chwilio am gyfleoedd i weithio gyda'n pwyllgorau seneddol cyfatebol ar draws y DU ar y materion hyn.
Yr egwyddorion craidd yw:
- ni fydd unrhyw atchweliad i’r amddiffynfeydd cydraddoldeb a hawliau dynol sydd gennym yma ym Mhrydain ar ôl i ni adael yr UE;
- dylai Cymru sefydlu mecanwaith ffurfiol i olrhain datblygiadau yn y dyfodol o ran hawliau dynol a chydraddoldeb yn yr UE, i sicrhau bod dinasyddion Cymru yn elwa o'r un lefel o ddiogelwch â dinasyddion yr UE; a
- dylai Cymru barhau i fod yn arweinydd byd-eang ym maes hawliau dynol, ac ymrwymo i gyflwyno deddfwriaeth i gau unrhyw fylchau o ran hawliau ac amddiffyniad os nad yw Llywodraeth y DU yn gwneud hynny (lle bo modd).
Rydym o'r farn bod yn rhaid cadw'r Siarter Hawliau Sylfaenol mewn rhyw ffurf ar ôl ymadael â’r UE. Croesawn y datganiad a wnaed gan Carwyn Jones, Prif Weinidog Cymru ar 24 Hydref[1] a oedd yn cefnogi'r ymdrechion i sicrhau y bydd Bil yr Undeb Ewropeaidd (Ymadael) yn parhau i barchu'r Siarter ar ôl Brexit. Rydym hefyd yn croesawu ymrwymiad Llywodraeth y DU i gyhoeddi'r dadansoddiad o sut y bydd hawliau'r Siarter yn cael eu diogelu ar ôl i'r DU ymadael â’r UE.
Bydd y Pwyllgor hefyd yn ceisio:
- Ymgysylltu o ran y gwaith craffu ar Fil yr Undeb Ewropeaidd (Ymadael);
- Ystyried y posibilrwydd o ddatblygu cyfraith hawliau dynol yng Nghymru, fel yr awgrymwyd yn y dystiolaeth a ddaeth i law.
Fel Pwyllgor, rydym yn awyddus i’n pryderon gael eu clywed ar lefel y DU, ac felly byddem yn croesawu pob cyfle i gydweithio gyda phwyllgorau cyfatebol, gan gynnwys, gyda’r Cyd-bwyllgor ar Hawliau Dynol. Deallaf fod clercod y pwyllgorau cydraddoldeb a hawliau dynol perthnasol yn gweithio ar hyn o bryd ar geisio dod o hyd i ddyddiad cyfleus i’r Cadeiryddion gyfarfod i drafod blaenoriaethau a materion sydd o ddiddordeb i bawb ohonom.
Yn gywir
John Griffiths
AC
Cadeirydd
Croesewir gohebiaeth yn Gymraeg neu yn Saesneg.
We welcome correspondence in Welsh or English.